打造「國際金庸中心」；創造特區「十贏」局面

上篇 <何不興建金庸主題樂園﹖> 寫咗三千幾字， 依然意猶未盡。其實尋日只係介紹咗「金庸樂園」嘅內容，都仲未分析興建樂園會為香港帶來咩好處。大家唔好以為我吹水無極限、認定「金庸樂園」只係紙上藍 圖，其實興建「金庸樂園」好處多多，我係咁意數下，就已經搵到十個好處，絕對可以話係「十贏方案」。而家上海要做國際金融中心，又話要起迪士尼樂園，香港 啲優勢被上海搶晒，愈來愈邊緣化，認真陰公。上海想做國際金融中心，香港不如索性轉型做「國際金庸中心」，巧妙結合特區「六大產業」，方為上策。邊「六大 產業」﹖當然唔係曾蔭權狗噏果堆，而係指香港最賺錢果六行，即係地產、旅遊、飲食、教育、堪輿同影視娛樂。

以下呢一篇，就係提出具體規劃方法，並且從全方位評估興建樂園之後嘅好處，以證明打造「國際金庸中心」絕對可以創造特區「十贏」局面。

一、響邊度興建﹖

首先要問，響邊度起﹖尋日我講過可以響馬灣南部主題公園用地度 興建「金庸樂園」，諗諗吓要收返呢句說話。雖然塊地到而家都仍然空置，不過果度只得12公頃面積，真係「豆腐膶咁細、到喉唔到肺」﹗香港迪士尼出名細，都 佔地40幾公頃，如果要起「金庸樂園」，點可以仲細啲﹖上海準備起迪士尼，單係第一期就有150公頃，如果起埋第二期，仲有400公頃添﹗

一定有人出來講，香港地少人多嘛，冇計啦﹗唔通又填海咩﹖環保份子一定同你死過﹗咁唔填海又可以去邊度搵咁大塊土地呢﹖我諗來諗去，先至諗到解決方法，就係將樂園起響新界西嘅洪水橋。其實港府早響99年就已經提出過響元朗洪水橋、上水古洞及粉嶺北三處地點興建逾千公頃嘅「無煙環保城」。方案後來被立法會否決，隨著老懵董腳痛，「環保城」概念亦胎死腹中。曾狗噏上台後打算恢復進行三個新市鎮嘅規劃及工程研究，所以洪水橋而家就做緊土地平整工程。

與其起多個新市鎮，點解唔響果度起個「金庸樂園」﹖單係一個洪水橋新市鎮，就已經佔地435公頃，如果充分運用，仲大過上海果個迪迪尼。我地唔一定要用 晒，用一半如何﹖200多公頃，應該綽綽有餘了。當然，我唔係話唔起新市鎮，洪水橋、古洞加粉嶺北有上千公頃土地有待開發，而家只用五份一嚟起「金庸樂 園」，振興經濟、製造大量就業機會，長遠而言對香港一定利多於弊。更何況「金庸樂園」起好之後，會帶旺埋果三個新市鎮，咁對該區發展亦會有好大幫助。交通 方面，洪水橋已有輕鐵，而且籌備緊開多個西鐵站，就響兆康同天水圍中間。就地開多個「金庸站」的話，市民就可以搭西鐵去「金庸樂園」。

二、搵邊個投資﹖

第二個要解決嘅問題係，搵咩人投資﹖即使政府用公帑資助，咁邊個管理同營運﹖我嘅建議係，政府搵長實同TVB合作，三方共同揼本興建「金庸樂園」，股權三分，互相制衡。政府當然係最大股東，不過管理同營運方面就交俾長實同TVB。長實有錢財，無線有人才，政府不宜出太多錢。而點解要咁樣安排﹖好簡單，如果冇官商勾結嘅機會，政府睬你都有味啦﹗所以無奈之下，唯有隻眼開隻眼閉，提供經濟誘因俾佢地去起「金庸樂園」。係好犯賤，不過相信樂園興建後會帶來鉅額收入，亦會為整體社會帶來多方面好處，我覺得係值得一搏嘅。

03年長實已經考慮過「金庸樂園」呢個概念，之後唔知點解不了了之，我懷疑係因為馬灣果邊太細。如果改響洪水橋興建，配合埋新市鎮嘅規劃，咁就應該有得諗。根據我上篇建議嘅樂 園規劃，呢個計劃絕對係商機處處、潛力無窮。長實冇理由有錢都唔賺。至於CCTVB方面，一定要努力爭取合作。TVB幾十年來推廣金庸作品出力唔少，而且 擁有大量相關影視資源。如果佢地肯加盟，咁就可以將歷年所有金劇相關物品展出，順便響果度賣埋VCD、DVD。TVB亦可以提供古裝俾樂園，仲有叫旗下嘅藝人去樂園客串扮演武林人物，增加樂園吸引力。咁啲遊客參觀緊嘅時候，可以搵「周伯通秦煌」玩吓「雙手互搏」、同「洪七公劉丹」一齊唱「蓮花落」，又或者同「岳不群王偉」、「任我行羅樂林」格劍，都真係幾有趣。

由於啲演員會老，唔可以扮好耐，所以仿傚杜莎夫人蠟像館咁同啲經典角色整真人蠟像，擺響樂園入面永久擺放。單係一個黃蓉蠟像，已經可以整「米雪版」、「翁美玲版」、「朱茵版」、「周迅版」來反映唔同年代嘅審美觀。遊客可以比較吓邊個扮相最靚。另外TVB如果再開拍金劇，可以去樂園搞宣傳活動，用明星刺激人流，真係一家便宜兩家著。就算以後唔再拍金劇，TVB閒時亦可以響果度拍古裝外景，當係樂園其中一個賣點。近年TVB形象低落，如果宣佈投資「金庸樂園」，肯定即時形象翻身。

三、邊啲人會得益﹖

第三個問題，邊啲人會得益﹖上面一直講話「十贏方案」，冇錯，呢個計劃起碼有十方面嘅人得 益。第一個贏家自然係地產商長實，佢地肯定賺大錢，呢點可以省略。第二個贏家係TVB，上面果段已經解釋咗原因。第三個贏家係金庸先生，整個樂園需要佢點 頭贊成，自然少不免一大筆版權費。金老晚年咁辛苦為新修版作修訂，最大原因都只不過係版權就快過期，想再掠一筆啫。而家咁大筆生意，金庸係精明商人，自然 唔會放過。加上外國人向來唔太認識金庸，樂園可以幫金老增加國際知名度，爭取下個諾貝爾文學獎嘅機會都大啲啦﹗

影視界係第四個贏家。歷年電影界都出過唔少金庸改編作品。試諗一吓，有邊啲紅星未拍過金庸改編作品﹖真係少之又少。但花無百日紅，明星都會老、都會霉，而「金庸樂園」就成為佢地再登台、可以繼續掠水嘅絕佳場所。如果唔講，又有幾多人記得羅樂林係第一代楊過、梁家仁係第一代喬峰﹖遊客來到「金庸樂園」，可以懷緬佢地舊日嘅風光，讓佢地留名青史。而且TVB人工咁奀，啲三、四線藝員可以來樂園賺吓外快，何樂而不為﹖至於香港班電影武指，冇工開的話可以去樂園耍吓功夫、同啲遊客吊威也，咁又有水搵。

將樂園起響洪水橋亦令「天水圍民」成為第五個贏家。「金庸站」就響天水圍隔離，一定會帶旺當區人流、製造大量就業機會。天水圍市民成日話果區工作機會唔 多、公共設施又唔夠，而家「金庸樂園」進駐，一定有助改善以上兩種情況。工作機會大增以後，少咗天水圍人跨區工作，幫助舒緩在職貧窮問題，怨氣少啲、社會 都和諧啲。

文化界係第六個贏家。董啟章振臂高呼「香港需要文學館」，冇錯，我地可以響樂園入面先起一個「金庸文學館」打頭炮。館內除咗展出歷代金庸作品之外，仲可以成為「金庸學術研討會」嘅大本營，俾啲金學家如倪匡、陳墨、潘國森響度搞講座，進行文化交流。咁遊客就可以寓學習於玩樂，有助推廣香港學術文化。

文化界得益，教育界都唔例外。老師同家長就係第七個贏家。而家啲學生嘅中文水平愈來愈低，正係因為睇書睇得少。我地個年代啲 人不知幾迷金庸小說，可惜而家已經愈來愈少學生識欣賞金庸作品。就係因為咁，先更加要興建「金庸樂園」。再次掀起「金庸熱」，長遠而言有助提升學生中文水 平。中學生嚟樂園玩，可以當做參與咗一項「文化活動」作呈分之用。平時叫佢地參加「文化活動」好似要佢地去死咁，不過「金庸樂園」就一定吸引到佢地。

窮人係第八個贏家。金庸武俠小說，首重俠義精神。如果要響資本主義社會搞「金庸樂園」，絕不能夠單單以商業掛帥，相反應該突顯俠義，做到有別於一般主題樂園。有中國文化特色嘅「金庸樂園」會仿傚香港賽馬會，將收益嘅一部份用作慈善用途，主要用來扶貧，縮窄貧富懸殊。

第九個贏家係中央政府。香港棄迪擁金，不再盲目崇洋，標誌住香港人終於不再「戀殖」、人心得以回歸。香港迪士尼收皮，亦有利於上海迪士尼發展，咁就可以河 水不犯井水，大家有水齊齊搵。如果「金庸樂園」砌贏迪士尼的話，更加為中國人爭光，提升中國國際地位，真係一舉多得。

最後一個贏家自然係特區政府。曾狗噏而家民望插水，已成一隻跛腳鴨，如果真係肯搞「金庸樂園」，推動旅遊業之餘可以推廣學術文化、賺錢之外又可以製造就業 機會；上市則股民開心、扶貧則草根安心；地產界、娛樂界、文化界、教育界又會舉腳贊成，咁到時特區政府仲唔民望勁升﹖來吧﹗唔好猶豫喇，一於將香港打造成 「國際金庸中心」，共同開創「十贏」局面罷啦﹗

何不興建金庸主題樂園﹖

《蘋果日報》：滬迪士尼拍板 香港旅遊業危危乎　學者促拓景點求存

上海要起迪迪尼，香港迪迪尼形勢更危。港府被人搵完一次笨，嫌蝕得唔夠甘，仲話要斥資再擴建。情形就好似買股票咁，十年前董伯誤以為迪迪尼係潛力股，大手 買入，簽下喪權辱國的不平等條約，點知坐艇，一坐就坐足十年﹗睇錯形勢入錯市本屬平常，最緊要識止蝕，係咁抱住隻爛鬼股票唔放，以為佢仲識生金蛋，殊不知 迪迪尼只係另一隻八號仔，隨時永無返家鄉之日﹗學曹仁超話齋，買股票最緊要係有「屍」，SORRY，係「勢」先至啱，而家上海話起迪迪尼，香港迪迪尼擺到 明大勢已去，咁就乾脆賣鬼咗佢，免得再揼錢落鹹水海啦﹗

一、金庸樂園

與其擴建迪迪尼，倒不如興建另一個主題樂園。要有香港本土特色，又要具備商業賣點，最好有埋教育功能，諗來諗去，都係「金庸武俠主題樂園」最有潛力。雖然 響好幾年前我已經主張搞「金庸樂園」，不過呢個概念唔係我首創，好多年前就有人提出過。例如03年長實競投佔地12.1公頃嘅馬灣南部主題公園用地時，就 曾考慮興建金庸主題樂園，可惜之後冇晒下文，塊地直到今時今日仍然空置﹗響高登都有唔少人贊成起「金庸樂園」，有關討論已成「月經帖」，三不五時就會有人 彈出來回帶。

如果真係起金庸武俠樂園，我建議響返馬灣南部度起，反正個乜嘢挪亞方舟都唔慌會有人去架啦，起咗金庸樂園之後仲可以帶旺埋隻爛船添。至於具體點搞，可以參考下文：

整個主題樂園分為「紫禁城」(鹿鼎主題館)、「桃花島」(射鵰主題館)、「雁門關」(天龍主題館)、「光明頂」(倚天主題館)、「黑木崖」(笑傲主題 館)、「絕情谷」(神鵰主題館)，總共六個主要部份。樂園東面係「桃花島」；南面有「絕情谷」；西面有「黑木崖」加「光明頂」；北面係「雁門關」，「紫禁 城」則置中。

二、紫禁城

樂園建築走古代風格，各主題館可呈現不同朝代的建築特色，部份場景亦可以加少少奇幻。為配合樂園氣氛，遊客入園後必須換上古代服飾。所有古裝廉價出租，會 有個「阿朱」幫你置妝玩cosplay，讓你盡情扮演各式大俠同俠女。遊客入園後，首先會望到正中嘅「紫禁城」，又名「鹿鼎主題館」。館內裝潢富麗堂皇， 好似一個迷你故宮。朝廷上有個臨記扮皇帝歡迎遊客光臨，廷下有個鰲拜同你玩摔角（可以禮聘徐錦江來客串），贏到佢的話就獲賜封鹿鼎公，另送一本四十二章 經，俾你拎住影番張相留念（咁當然要收錢啦）。而宮內其他地方，就主要用來賣精品。金庸武俠周邊產品諸如「仿真倚天劍」、「塑膠屠龍刀」，乃至「金庸 online game」、古董遊戲「金庸群俠傳」等等都一應俱全。

三、桃花島

遊客行去東面就會見到「桃花島」(射鵰主題館)。桃花島按五行八卦建造，極其複雜，本身就係一個大迷宮。遊客到此，可以嘗試挑戰迷宮，睇下走唔走到出去。 島上桃花飄飄、機關重重，遊客隨時會迷失到江南六怪喪身之處，好彩的話又有機會搵到失傳已久的《九陰真經》。如果順利走到終點，仲會有個風水佬同你免費睇 相。海洋公園可以搵司徒法正宣傳，金庸樂園亦可以禮聘蘇民峰、麥玲玲來幫手，有需要的話響側邊留個空位俾人掘窿祈福（逐下計錢）。香港人咁鬼迷信，有得玩 又有得睇風水，仲可以掘窿，仲唔仆到嚟﹖

「桃花島」旁邊整個「漁樵耕讀激流」，遊客坐一條獨木舟逆流而上，水中會有兩條機械金娃娃游下游下，令水面金光閃閃。另外再參照「環球影城」入面嘅「大白 鯊」，響「漁樵耕讀激流」加入電動周伯通騎住鯊魚突然從水面殺出，濺得遊客成身濕晒（咁佢地需要換衫的話又賺一筆）。

四、雁門關

由「桃花島」向北有條小徑行去「雁門關」(天龍主題館)。所謂「上天下海」，玩完激流就玩飛天。各位可於雁門關前大玩機動遊戲「游坦之人肉風箏」，好似電 影《無極》個張柏芝咁滿天飛。遊客亦可以響專業人員陪同之下吊威也、練輕功，想像自己係金庸武俠世界中嘅大俠，真正體驗於空中「吊吊揈」嘅滋味。呢種體驗 乃係全球獨有、別無分號，鬼佬向來鍾情於中國武俠片入面嘅輕功，而家可以俾佢地一嚐吊威也滋味，仲唔仆到來響應唐英年呼籲吊埋一份﹖相信佢地響「吊吊揈」 嘅時候，會領略到「降龍十八掌」入面「亢龍有悔」嘅真諦。

五、光明頂與黑木崖

去完「雁門關」，向西走就會到「光明頂」(倚天主題館)。響呢度，遊客可以見到「六大派圍攻明教」嘅經典場面。廣場上有精彩武術表演，遊客亦可以落場比武 爭奪屠龍刀做武林至尊（要收錢），由十九才子陶傑來旁述賽事，增加吸引力。睇完表演，可經由明教秘道通往旁邊的「黑木崖」(笑傲主題館)，同任我行、令狐 沖一齊觀賞「東方不敗人妖show」。黑木崖上，東方不敗聯同岳不群、林平之載歌載舞跳老舞，遊客可以跳埋一份（要收錢）。而家泰國政局不穩、旅遊業低 迷，香港大搞人妖show實行搶埋佢地生意。

大家仲可以響「黑木崖」玩角色扮演。只要付出一定價錢，遊客就可以扮作日月神教教主，安坐寶座上接受由超過三十位工作人員飾演嘅教眾朝拜。教眾一邊拜，一 邊向你高呼：「參見神教文成武德、澤被蒼生聖教主﹗聖教主千秋萬載，一統江湖﹗」讓你過足皇帝癮，盡情滿足中國人果種深印於基因嘅權力慾。

六、絕情谷

來到南面嘅絕情谷(神鵰主題館)，食過斷腸草，就可以排隊玩「絕情谷笨豬跳」（另外收費）。情侶有優惠，二人同行、一人價錢，實行「You jump, i jump」，港版楊過、小龍女隨時浪漫過《鐵達尼號》。呢度亦係考驗情侶嘅大好機會。愛人跳咗落去，你敢唔敢跟住跳﹖情侶玩「絕情谷笨豬跳」體驗同生共 死，跳完之後肯定愛得更加轟烈﹗

你亦可以跟裘千尺大鬥「吐核神功」。呢個項目專為國內遊客而設，由工作人員扮演嘅裘千尺會同遊客比賽「吐核」鬥遠。內地人平日吐痰訓練有素，相信要贏得比賽並唔困難。吐贏嘅話楊過會送你三枚金針，晚上拎住金針可以參加「郭襄生日會」，欣賞樂園嘅煙花表演。

金庸樂園不比迪迪尼遜色，絕情谷都有3D電影館。年滿18歲嘅觀眾可購票入場觀賞緊張刺激嘅立體電影，電影名稱為「尹志平與小龍女」。電影可以請蕭若元拍攝，反正佢籌備緊拍《3D玉蒲團》，唔爭在拍多套《3D小龍女》啦。

七、吃喝方面

玩咗咁多，肚餓嘅話有乜好食﹖首選當然係「黃蓉私房菜」啦﹗「黃蓉私房菜」座落於桃花島南面，招牌菜有「叫化雞」、「好俅湯」、「玉笛誰家聽落梅」以及 「二十四橋明月夜」。唔好以為呢啲菜色「只應書上有」，鏞記以前搞過「射鵰英雄宴」，就煮過「二十四橋明月夜」。

傳統菜色唔啱食嘅話，年青人亦可以幫襯紫禁城對出嘅「丫環Cafe」。由於金庸筆下人物都唔係廣東人，扮演丫環嘅美女工作人員最好由大陸或台灣輸入。客人 一入Cafe，多位美女丫環好似雙兒、小昭、阿碧就會操住一口流利國語好溫柔咁走來同你講：「相公，你回來了～」客官每次消費滿三百蚊可獲贈印花一個，儲 夠十個印花再加99蚊就有機會同雙兒「大功告成、親個嘴兒」。

八、住宿方面

食好當然亦要住好。樂園內有「麗春院大酒店」同「悅來客棧」任君選擇。樂園酒店係清式建築，住響呢度，遊客可感受時光倒流，想像自己置身於古代世界。「麗 春院大酒店」內設施齊備，房內有「八人豪華大床」。客官仲可以指名由Poly援交大學生扮演嘅花姑娘服侍，一於跟韋小寶學返首「十八摸」。

九、文教方面

除咗吃喝玩樂，金庸主題樂園亦身肩教育重責。樂園深具文化素養，設有四個文教館，分別為：「金庸博物館」、「影視資料館」、「武俠圖書館」同埋「兒童教育 館」。「金庸博物館」內藏有金庸先生捐贈出來嘅展品；「影視資料館」則儲齊歷年金庸小說改編劇集同電影嘅錄影帶、DVD、海報等珍藏；「武俠圖書館」收藏 所有不同版本嘅金庸武俠小說，開放給公眾參觀。至於「兒童教育館」，入面會一路播住「一理通，百理明，明白了計算可變簡單」嘅ETV背景音樂，一路有個瑛姑教入場嘅細路仔演算「九宮之法」同「天元之法」。旁邊仲有個蘇星河佈下「珍瓏棋局」，每局廿蚊，教細路仔捉棋，順便製造就業機會俾旺角班「殘局阿伯」。

十、特別節目

主題樂園裡面當然唔少得煙花同巡遊。煙花之前講咗，而家講埋巡遊。多位工作人員扮演唔同金庸武俠角色，同遊客互動兼影相。你可以幫手捉拿採花大盜田伯光， 又可以同段譽去無量洞拜下神仙姐姐；喜歡的話搵陳近南影幅相，取得自稱英雄嘅資格都唔錯。樂園入面仲有啲特殊人物，比如「賞罰善惡」嘅張三李四，佢地專門 保持園內清潔、維持樂園秩序。當見到有國內遊客隨地大小便時，張三李四會請佢地去「思過崖」面壁三分鐘靜思己過；如果見到有公德心嘅遊客，張三李四亦可能 請佢地去「俠客島飯堂」食碗免費「臘八粥」。

十一、結語

有得食、有得玩、有書讀、有戲睇、有女"目及"、仲有窿掘，「金庸主題樂園」集吃喝、娛樂、文教於一身，一次過滿足中外遊客六個願望咁多。不論男女老幼，都一定能夠響呢度搵到樂趣。嘩，諗落真係未興建、先興奮呀﹗

原文：http://lunyeah.xanga.com/715896110/